கலாச்சாரத்தில் தொடுப்போம் கவிச்சரம்

*கலாச்சாரத்தில் தொடுப்போம் கவிச்சரம்*

கலைகளால் அணிசெய்து காவியம் ஆக்கியே/

சிலைகளால் சீர்மிக்க சிந்தனையால் தேக்கியே/

அலைகளாய் சொல்கோத்து அடுக்கிய நூல்களால்/

மலைபோல உயர்ந்ததே மறத்தமிழ்க் கலாச்சாரம்/

அன்னையுடன் தந்தையின் அன்பிலே உதித்தது/

தன்னையே மிஞ்சிடத் தனிவழி காட்டிடும்/

அண்ணலாம் ஆசானின் அருள்வழி நடத்தலில்/

எண்ணரும் சிறப்பினால் ஏற்றமிகப் பெற்றதே/

உறவுப் பாலங்களால் உணர்வுக் கட்டமைத்து/

மரபின் வேலிகளால் மங்காத நெறியமைத்து/

உறவைப் பேணிடவே விழாக்கள் பலஅமைத்து/

துறவும் போற்றிட்ட தூயதமிழ் கலாச்சாரம்/

செம்புலப் பெயல்நீராய் சொந்தத்தை உருவாக்கி/

இம்மையில் இவளேயென இறுக்கிய முடிச்சிட்டு/

எம்மாந்தரும் வியப்பினிலே ஏறிட்டுப் பார்த்திடும்நல்/

செம்மாந்த கலாச்சாரச் செழுந்தமிழர் வாழியவே/ 

செந்தமிழ்ச்சுடர்

அ.செலஸ்டின் மகிமை ராஜ்

வேம்பார்